நாடாளுமன்ற தேர்தல் 5ம் கட்ட வாக்குப்பதிவு நாளில் ஒரே கல்லில் 2 மாங்காய் அடித்த இந்தியன் 2 படக்குழு..!

நாடாளுமன்ற தேர்தலுக்கான 5ம் கட்ட வாக்குப்பதிவு நடந்து கொண்டிருக்கும் இன்று ஒரே கல்லில் இரண்டு மாங்காய் அடித்துவிட்டது இந்தியன் 2 படக்குழு. வாக்களிக்கச் சொல்லி அவர்கள் வெளியிட்ட போஸ்டர் வைரலாகி விட்டது.

ஷங்கர் இயக்கத்தில் கமல் ஹாசன், காஜல் அகர்வால், சித்தார்த் உள்ளிட்டோர் நடித்திருக்கும் இந்தியன் 2 படம் வரும் ஜூலை மாதம் 12ம் தேதி தியேட்டர்களில் ரிலீஸாகவிருக்கிறது. லைகா நிறுவனம் தயாரித்திருக்கும் இந்தியன் 2 படத்திற்கு அனிருத் இசையமைத்திருக்கிறார்.

இந்தியன் 2 படம் தமிழ் தவிர்த்து தெலுங்கு, இந்தி என 5 மொழிகளில் ரிலீஸாகவிருக்கிறது. இந்நிலையில் தான் இந்தியன் 2 படம் ஒரே கல்லில் இரண்டு மாங்காய் அடித்திருக்கிறது. நாடாளுமன்ற தேர்தல் 7 கட்டங்களாக நடக்கிறது.

இன்று 5ம் கட்ட வாக்குப்பதிவு நடந்து வருகிறது. 49 நாடாளுமன்ற தொகுதிகளுக்கான வாக்குப்பதிவு இன்று காலை துவங்கி நடந்து கொண்டிருக்கிறது. உத்தர பிரதேசத்தில் 14 தொகுதிகள், மகாராஷ்டிராவில் 13 தொகுதிகள், மேற்கு வங்கத்தில் 7 தொகுதிகள், பீகாரில் 5 தொகுதிகள், ஜார்க்கண்டில் 3 தொகுதிகள், ஒடிஷாவில் 5 தொகுதிகள், ஜம்மு காஷ்மீரில் ஒரு தொகுதி, லடாக்கில் ஒரு தொகுதியில் இன்று வாக்குப்பதிவு நடந்து கொண்டிருக்கிறது.

இந்த நேரத்தில் இந்தியன் தாத்தா கையில் ஓட்டு போட்ட மை இருக்கும் போஸ்டரை வெளியிட்டுள்ளனர். நீங்கள் விரும்பும் மாற்றமாக மாறுங்கள், வாக்களியுங்கள் என்று அந்த போஸ்டரில் குறிப்பிடப்பட்டுள்ளது. இந்துஸ்தானி 2 போஸ்டரை எக்ஸ் தளத்தில் வெளியிட்டு, ஒரு இந்துஸ்தானி, ஒரு ஓட்டு, ஒரு குரல், நீங்கள் விரும்பும் மாற்றமாக மாறுங்கள், பொறுப்புடன் வாக்களியுங்கள் என தெரிவித்துள்ளார் உலக நாயகன் கமல் ஹாசன்.

லைகா நிறுவனமும் அதே போஸ்டரை வெளியிட்டு வாக்களிக்குமாறு தெரிவித்துள்ளது. அந்த போஸ்டரை பார்த்தவர்களோ, ஊழலுக்கு எதிரான இந்தியன் தாத்தாவை வைத்து மக்களை வாக்களிக்க வலியுறுத்தியுள்ளனர். இது சூப்பர் ஐடியா என்கிறார்கள்.மக்களை வாக்களிக்கச் சொன்னது மாதிரியும் ஆச்சு, இந்தியன் 2 படத்திற்கு அழகாக விளம்பரம் தேடிய மாதிரியும் ஆச்சு. ஆக, வாக்குப்பதிவு நாள் அன்று ஒரே கல்லில் இரண்டு மாங்காய் அடித்துவிட்டது இந்தியன் 2 படக்குழு. சரியான நேரத்தில் இப்படி போஸ்டர் வெளியிட்டு அனைவரின் கவனத்தையும் ஈர்த்துவிட்டார்கள்.