நார்த்வெஸ்ட் ஆப்பிரிக்கா 12264 எனப் பெயரிடப்பட்ட, வெறும் 50 கிராம் எடையுள்ள ஓர் விண்கல், சூரியக் குடும்பத்தின் வரலாற்றை மீள மதிப்பீடு செய்யும் அளவிற்கு புதிய விளக்கங்களை வழங்கியுள்ளது.
இது போன்ற பாறை உலகங்கள் (rocky worlds) எப்போது மற்றும் எப்படி உருவானது என்பது குறித்து புதிய புரிதலை முன்வைக்கும் இந்த ஆய்வை, தி ஓபன் யுனிவர்சிட்டியின் டாக்டர் பென் ரைடர்-ஸ்டோக்ஸ் தலைமையிலான குழு மேற்கொண்டு, Communications Earth & Environment என்ற அறிவியல் இதழில் வெளியிட்டுள்ளது.
பூமி மற்றும் செவ்வாய் போன்ற உட்புறக் கோள்கள், வெப்பநிலை காரணமாக வெளிப்புற கோள்களை விட முன்னதாக உருவானவை என முந்தைய நம்பிக்கையைக் கைவிடும் வகையில், இந்த விண்கல் வழங்கும் தகவல்கள் சூரியக் குடும்பம் முழுவதும் கோள்கள் ஒரே காலப்பகுதியில் உருவானதாகக் காட்டுகின்றன.
குரோமியம் மற்றும் ஆக்ஸிஜன் ஐசோடோப்புகளின் அளவுகள், இந்த விண்கல் வெளிப்புற சூரியக் குடும்பத்தில் உருவானதை உறுதிப்படுத்துகின்றன. மேலும், ஈய ஐசோடோப்புகளை பயன்படுத்தி கணிக்கப்பட்ட வயது 4.564 பில்லியன் ஆண்டுகள் என நிரூபிக்கப்பட்டுள்ளது — இது, பூமி போன்ற கோள்கள் உருவான காலத்துடன் நெருக்கமாக உள்ளது.
இந்த கண்டுபிடிப்பு, பனிச்சத்துள்ள கோள்கள் மெதுவாக உருவானவை என்ற பாரம்பரிய நம்பிக்கைக்கு சவால் விடுக்கிறது. கோள்கள் விரைவாக, ஒத்திசைவாக உருவாகியிருப்பதற்கான சாத்தியத்தை இது வலியுறுத்துகிறது. மேலும், இந்தத் தகவல்கள் எக்ஸோபிளானட் அமைப்புகள் குறித்த ஆய்வுகளுடனும் ஒத்துப் போகின்றன.
விண்வெளியின் அளவில் இந்த கால வேறுபாடு மிகச் சிறியது போல் தோன்றினாலும், அதன் தாக்கம் மிகப் பெரிது. இது, பூமியைப் போன்ற கோள்கள் எங்கு, எப்போது உருவாகக்கூடும் என்பதற்கான புதிய விளக்கங்களை வழங்கி, வானியலின் பாரம்பரியக் கருத்துக்களில் புரட்சி ஏற்படுத்தக் கூடியது.