இருபதுக்கு 20 உலகக் கிண்ணக் கிரிக்கெட் தொடரின் சூப்பர் 8 சுற்றில், இலங்கை அணி பங்கேற்கும் முதல் போட்டி இன்று ஞாயிற்றுக்கிழமை இடம்பெற்றது.
இலங்கைக்கு எதிரான இந்தப் போட்டியில் இங்கிலாந்து அணி 51 ஓட்டங்களால் வெற்றி பெற்றுள்ளது.
பிற்பகல் 3.00 மணிக்கு கண்டி, பல்லேகல சர்வதேச மைதானத்தில் ஆரம்பமான இப்போட்டியில் நாணய சுழற்சியில் வெற்றி பெற்ற இலங்கை அணி முதலில் பந்துவீச தீர்மானித்தது.
இதன்படி முதலில் துடுப்பாடிய இங்கிலாந்து அணி நிர்ணயிக்கப்பட்ட 20 ஓவர்கள் நிறைவில் 9 விக்கெட்டுக்களை இழந்து 146 ஓட்டங்களைப் பெற்றுள்ளது.
இங்கிலாந்து அணி சார்பில் பில் சோல்ட் 62 ஓட்டங்களை அதிகபட்சமாக பெற்றுக் கொடுத்தார்.
இலங்கை அணி சார்பில் பந்துவீச்சில் துனித் வெல்லாலகே 3 விக்கெட்டுக்களையும், மகேஷ் தீக்ஸன 2 விக்கெட்டுக்களையும், டில்சான் மதுஷங்க 2 விக்கெட்டுக்களையும், துஷ்மந்த சமீர ஒரு விக்கெட்டையும் வீழ்த்தினர்.
இதன்படி 147 என்ற வெற்றியிலக்கை நோக்கி துடுப்பாடிய இலங்கை அணி 16.4 ஓவர்கள் நிறைவில் சகல விக்கெட்டுக்களையும் இழந்து 95 ஓட்டங்களை மாத்திரமே பெற்று தோல்வியடைந்தது.
இது இலங்கைக்கு எதிராக இங்கிலாந்து அணி தொடர்ச்சியாகப் பெற்ற 12 ஆவது இருபதுக்கு 20 வெற்றி ஆகும்.
அத்துடன், இலங்கை அணி 95 ஓட்டங்களுக்கு ஆட்டமிழந்தமையானது, சொந்த மண்ணில் பெற்ற இரண்டாவது குறைந்த ஓட்ட எண்ணிக்கையாகக் கருதப்படுகிறது.
மேலும், இப்போட்டியானது இருபதுக்கு 20 உலகக் கிண்ணப் போட்டிகளில் இங்கிலாந்துக்கு எதிராக இலங்கை பெற்ற 6 ஆவது தோல்வியாகப் பதிவாகியுள்ளது.
இன்றைய போட்டியுடன், உலகக் கிண்ணப் போட்டிகளில் இரு நாடுகளுக்கும் இடையில் 7 போட்டிகள் நடைபெற்றுள்ளன, இதில் இலங்கை ஒரேயொரு போட்டியில் மாத்திரமே வெற்றி பெற்றுள்ளது.
2012 உலகக் கிண்ணத்திற்குப் பிறகு எந்தவொரு சந்தர்ப்பத்திலும் இலங்கையினால் இங்கிலாந்தை வீழ்த்த முடியாமல் போனதுடன், 14 வருடங்களுக்கு பின்னர் வெற்றி எதிர்பார்க்கப்பட்ட போதிலும், இம்முறையும் தோல்வியிலேயே முடிவடைந்துள்ளது.
ஆட்டநாயகனாக இங்கிலாந்தின் வில் ஜெக்ஸ் தெரிவானார்.