2027 ஆம் ஆண்டிற்கான பெண்களுக்கான கால்பந்து உலகக்கோப்பை போட்டிகள் எங்கே நடைபெறவுள்ளது என்பதை பிபா அறிவித்துள்ளது.
பிபா கால்பந்து உலகக்கோப்பை போட்டி நான்கு ஆண்டுகளுக்கு ஒருமுறை நடைபெற்று வருகின்றது. அதைப்போல பெண்களுக்கான கால்பந்து உலகக்கோப்பை போட்டியும் கடந்த 1991 ஆம் ஆண்டு முதல் நான்கு ஆண்டுகளுக்கு ஒருமுறை நடைபெற்று வருகின்றது. இதுவரை ஒன்பது முறை பெண்களுக்கான கால்பந்து உலகக்கோப்பை தொடர் நடைபெற்றுள்ளது.
இதில் யுனைடெட் ஸ்டேட்ஸ் நான்கு முறையும், ஜெர்மனி இரண்டு முறையும் உலகக்கோப்பையை வென்றுள்ளது. அதைத்தொடர்ந்து ஜப்பான், நார்வே, ஸ்பெயின் ஆகிய நாடுகள் தலா ஒருமுறை கோப்பையை வென்றுள்ளது. கடைசியாக 2023 ஆம் ஆண்டு ஆஸ்திரேலியா மற்றும் நியூஸிலாந்து நாடுகளில் பெண்களுக்கான கால்பந்து உலகக்கோப்பை போட்டி நடைபெற்றது.
இந்த தொடரில் ஸ்பெயின் அணி வென்று உலகக்கோப்பையை கைப்பற்றியது. இந்நிலையில் 2027 ஆம் ஆண்டிற்கான பெண்களுக்கான கால்பந்து உலகக்கோப்பை தொடர் எங்கே நடைபெறும் என தெரிந்துகொள்ள ரசிகர்கள் ஆவலாக இருந்தனர். இதைத்தொடர்ந்து தற்போது பிபா உலகக்கோப்பை நடைபெறும் நாட்டை தேர்ந்தெடுத்துள்ளது. 2027 ஆம் ஆண்டிற்கான பெண்களுக்காக உலகக்கோப்பையை நடத்த பல நாடுகள் விருப்பம் தெரிவித்து விண்ணப்பித்தது.
அமெரிக்கா, மெக்சிகோ, பிரேசில், பெல்ஜியம், ஜெர்மனி, நெதர்லாந்து ஆகிய நாடுகள் 2027 ஆம் ஆண்டு நடைபெறவுள்ள பெண்களுக்கான கால்பந்து உலகக்கோப்பையை நடந்த விருப்பம் தெரிவித்து விண்ணப்பித்தது. இதில் அமெரிக்கா மற்றும் மெக்சிகோ ஆகிய நாடுகள் போட்டியில் இருந்து விலகியது. இதைத்தொடர்ந்து பிரேசில் மற்றும் பெல்ஜியம், ஜெர்மனி, நெதர்லாந்து ஆகிய நாடுகளுக்கு இடையே கடுமையான போட்டி நிலவியது.
இந்நிலையில் பிபா நிர்வாகம் வாக்கெடுப்பு நடத்தியது. இந்த வாக்கெடுப்பில் பிரேசில் அணி அதிக வாக்குகளை பெற்று வென்றது. எனவே பிரேசில் அணி 2027 ஆம் ஆண்டு நடைபெறவிருக்கும் பெண்களுக்கான கால்பந்து உலகக்கோப்பையை நடத்தும் உரிமையை பெற்றது. இந்நிலையில் 2027 ஆம் ஆண்டிற்கான பெண்களுக்கான கால்பந்து உலகக்கோப்பை போட்டி பிரேசிலில் நடைபெறவுள்ளது என்பது குறிப்பிடத்தக்கது.