அண்மைய ஆண்டுகளில் இந்தோனேஷியாவில் நடந்த மிகப்பெரிய எல்லை தாண்டிய மனிதக் கடத்தல் வழக்குகளில் ஒன்றில், சிங்கப்பூருக்கு அனுப்பப்பட்ட பல குழந்தைகள் உட்பட, குறைந்தது 34 பச்சிளங்குழந்தைகளை விற்றதாகக் குற்றம் சாட்டப்பட்ட ஒரு குழந்தை கடத்தல் கும்பலின் உறுப்பினர்களுக்கு 10 ஆண்டுகள் வரை சிறைத்தண்டனை விதிக்குமாறு இந்தோனீசிய அரசு வழக்கறிஞர்கள் செவ்வாய்க்கிழமை (ஜூன் 30) கோரியுள்ளனர்.
18 பெண்கள், ஓர் ஆண் என மொத்தம் 19 பிரதிவாதிகள், 2023க்கும் 2025க்கும் இடையில் குறைந்தது 34 குழந்தைகளைக் கடத்தியதாகக் கூறப்படும் குற்றச்சாட்டுகளின் பேரில் ஏப்ரல் மாதம் முதல் விசாரணைக்கு உட்படுத்தப்பட்டுள்ளனர்.
பச்சிளங்குழந்தைகளில் குறைந்தது 12, சிங்கப்பூருக்கு அனுப்பப்பட்டதாகவும், ஒவ்வொரு குழந்தையும் 200 முதல் 250 மில்லியன் ரூபியா ($18,110) வரை விற்கப்பட்டதாகவும் அரசு வழக்கறிஞர்கள் தெரிவித்தனர்.
இந்த வழக்கின் மையத்தில், லில்லி அல்லது போபோ என்றும் அழைக்கப்படும் 70 வயதான லீ சியு லுவான் உள்ளார். இவரையே இந்தக் கும்பலின் முக்கியத் தலைவராகப் புலனாய்வாளர்கள் விவரித்துள்ளனர். குழந்தைகளைச் சேர்ப்பதை ஒருங்கிணைத்து, ஆவணங்களைத் தயாரித்து, குழந்தைகளை வெளிநாடுகளுக்கு அனுப்ப ஏற்பாடு செய்ததாக அவர் கூறியதாக அரசு வழக்கறிஞர்கள் தெரிவித்துள்ளனர்.
இந்தக் கும்பலின் முக்கிய ஆள்சேர்ப்பாளர்களில் ஒருவர் எனக் கூறப்படும் அஸ்ட்ரி ஃபிட்ரினிகா, அவருடன் சேர்ந்து ஆள்சேர்ப்பாளர்களாகக் கூறப்படும் ஜாகா ஹம்தானி மற்றும் எலின், அத்துடன் தத்தெடுப்புத் தேவைகள் தொடர்பான அரசு ஆவணங்களைத் தவறாகப் பயன்படுத்தியதாகக் குற்றம் சாட்டப்பட்ட லாய் சூ ஹுவா ஆகியோருக்கு 10 ஆண்டுகள் சிறைத் தண்டனை விதிக்குமாறு அரசுத் தரப்பு வழக்கறிஞர்கள் கோரினர்.
குழந்தைகளுக்குப் பராமரிப்பாளர்களாகச் செயல்பட்டதாகக் கூறப்படும் மற்ற 14 பிரதிவாதிகள் ஒவ்வொருவருக்கும் ஐந்து ஆண்டுகள் சிறைத் தண்டனை கோரப்பட்டது.
விசாரணையின் போது, அந்தக் கும்பலுக்காக நான்கு சிங்கப்பூரர்கள் தத்தெடுப்பு முகவர்களாக செயல்பட்டதாகக் கூறப்படுவதாகவும் அவர்களை என அடையாளம் காட்டியதாகவும் திருவாட்டி லீ கூறினார்.
விசாரணையின் அடுத்த அமர்வு அடுத்த வாரம் நடைபெற உள்ளது. அப்போது பிரதிவாதிகள் தங்கள் தரப்பு வாதங்களை முன்வைப்பார்கள்.