அமெரிக்காவிலிருந்து பிரித்தானியாவுக்கு மீண்டும் குடிபெயர்ந்துள்ள இளவரசர் ஹாரி மற்றும் மேகன் தம்பதியினர், அரச குடும்பத்தின் பிரதிநிதிகளாகவோ அல்லது பணிபுரியும் உறுப்பினர்களாகவோ செயல்பட முடியாது என பிரித்தானிய மன்னர் சார்லஸ் உத்தியோகபூர்வக் கடிதம் மூலம் தெளிவுபடுத்தியுள்ளார்.
கடந்த 2020ஆம் ஆண்டு அரச குடும்பத்தின் பொறுப்புகளிலிருந்து விலகி அமெரிக்காவில் குடியேறிய ஹாரி – மேகன் தம்பதியினர், ஆறு ஆண்டுகளுக்குப் பிறகு தங்களது குழந்தைகளுடன் மீண்டும் பிரிட்டனுக்குத் திரும்பியுள்ளனர்.
இந்த திடீர் வருகையைத் தொடர்ந்து, அரச குடும்பத்தில் அவர்களின் அதிகாரம் மற்றும் அந்தஸ்து என்ன என்பது குறித்துப் பல்வேறு ஊகங்கள் எழுந்தன.
இந்நிலையில், அரச குடும்பத்தின் மூத்த நிர்வாகியான லார்ட் சாம்பர்லேனுக்கு (Lord Chamberlain) மன்னர் சார்லஸ் அனுப்பியுள்ள கடிதத்தில் இந்த விவகாரத்திற்கு முற்றுப்புள்ளி வைத்துள்ளார்.
அரசுத் துறைகள், ராணுவ அதிகாரிகள் மற்றும் முக்கியப் பிரமுகர்களுக்கு அனுப்பப்பட்டுள்ள அந்த உத்தியோகபூர்வக் கடிதத்தில், “ஹாரி மற்றும் மேகன் தம்பதியினர் அரச பிரதிநிதிகளாகச் செயல்பட மாட்டார்கள். அவர்களின் ‘ஹிஸ்/ஹெர் ராயல் ஹைனஸ்’ (HRH) என்ற அரச குடும்பத்தின் சிறப்புப் பட்டங்கள் தொடர்ந்து இடைநீக்கத்திலேயே இருக்கும்” என விளக்கமளிக்கப்பட்டுள்ளது.
மேலும், பிரிட்டனில் அவர்கள் மேற்கொள்ளும் தொண்டு மற்றும் வணிகச் செயல்பாடுகள் அனைத்தும் தனிப்பட்ட நபர்களின் நடவடிக்கையாகவே கருதப்படும் என்றும் குறிப்பிடப்பட்டுள்ளது.
ஹாரி மற்றும் மேகன் தம்பதியினர் பிரிட்டனில் சாதாரணக் குடிமக்களாக வாழவே விரும்புகின்றனர் என்பதை உறுதிப்படுத்தவே மன்னர் இந்த வழிகாட்டுதல்களை வெளியிட்டுள்ளார் எனப்க்கிங்ஹாம் அரண்மனை வட்டாரங்கள் தெரிவிக்கின்றன.
அமெரிக்காவின் கலிபோர்னியா மற்றும் போர்ச்சுகல் ஆகிய இடங்களில் வீடுகளை வைத்துள்ள இத்தம்பதியினர், தங்களது குழந்தைகளின் கல்விக்காகவே பிரிட்டனுக்குத் திரும்பியுள்ள நிலையில், மன்னர் சார்லஸின் இந்த அறிவிப்பு சர்வதேசத்தின் கவனத்தைப் பெற்றுள்ளது.