இஸ்ரேலில் இன்று (27) 26ஆவது பாராளுமன்றத் தேர்தல் நடைபெறும் நிலையில் உலகின் கவனம் இஸ்ரேல் பக்கம் திரும்பியுள்ளது.
இஸ்ரேலின் 120 உறுப்பினர்களைக் கொண்ட பாராளுமன்றமான நெசெட்டுக்கான (Knesset) உறுப்பினர்களைத் தேர்ந்தெடுக்கும் இந்தப் பொதுத்தேர்தல், பிரதமர் பெஞ்சமின் நெதன்யாகு மீண்டும் ஆட்சியைத் தக்கவைத்துக் கொள்வாரா அல்லது எதிர்க்கட்சிகள் புதிய அரசாங்கத்தை அமைக்குமா என்பதைத் தீர்மானிக்கும் முக்கிய தேர்தலாகக் கருதப்படுகிறது.
இஸ்ரேல் நேரப்படி இன்று காலை 7 மணிக்கு வாக்குச்சாவடிகள் திறக்கப்பட்டுள்ளன. வாக்குப்பதிவு இரவு 10 மணி வரை நடைபெறவுள்ளது. இந்தத் தேர்தலில் சுமார் 73 இலட்சம் இஸ்ரேலியக் குடிமக்கள் வாக்களிக்கத் தகுதி பெற்றுள்ளனர்.
இவர்களில் சுமார் 12 இலட்சம் பேர் இஸ்ரேலின் பலஸ்தீன அரபுக் குடிமக்கள் எனத் தெரிவிக்கப்படுகிறது. இஸ்ரேலில் வசிக்காத பெரும்பாலான குடிமக்கள் வெளிநாடுகளில் இருந்தபடி வாக்களிக்க முடியாது.
பொதுவான அஞ்சல் வாக்கு முறை இல்லாததால், அரசுப் பணியில் வெளிநாடுகளில் பணியாற்றும் தூதரக அதிகாரிகள் போன்ற குறிப்பிட்ட பிரிவினருக்கு மட்டுமே வெளிநாடுகளில் வாக்களிக்கும் வசதி வழங்கப்படுகிறது.
இஸ்ரேலில் மக்கள் நேரடியாகப் பிரதமரைத் தேர்ந்தெடுப்பதில்லை. அவர்கள் தங்களுக்குப் பிடித்த அரசியல் கட்சிக்கு வாக்களிக்கின்றனர். மொத்த ஆசனங்கள் 120,பாராளுமன்றத்துக்குள் நுழைவதற்கான குறைந்தபட்ச வாக்கு வீதம் 3.25% ஆகும்.
ஆட்சியமைக்கத் தேவையான பெரும்பான்மை 61 ஆசனங்களாகும். இந்நிலையில், எந்தவொரு கட்சியும் தனியாக 61 ஆசனங்களைப் பெறாவிட்டால், பிற கட்சிகளுடன் இணைந்து கூட்டணி அமைக்க வேண்டும். எனவே, அதிக வாக்குகளைப் பெறும் கட்சி மட்டுமே அடுத்த அரசாங்கத்தை அமைக்கும் என்று உறுதியாகக் கூற முடியாது