தனது சமூக ஊடகக் கணக்கில் முகமது நபியை அவமதிக்கும் செய்தியைப் பதிவிட்டதற்காக மரண தண்டனை விதிக்கப்பட்ட இளைஞர் அனோஜன் சிவராசாவை, கருத்துச் சுதந்திர உரிமையின் அடிப்படையிலேயே குற்றச்சாட்டுகள் சுமத்தப்பட்டுள்ளதால், உடனடியாகவும் நிபந்தனையின்றியும் விடுதலை செய்ய வேண்டும் என சர்வதேச மன்னிப்புச் சபை கோரிக்கை விடுத்துள்ளது.
சவூதி மேல்முறையீட்டு நீதிமன்றம் அனோஜன் சிவராசாவுக்கு மரண தண்டனை விதித்துள்ளது.
இந்நிலையில் தங்கள் கருத்துக்களைத் தெரிவித்ததற்காக மட்டும் யாரும் சிறையில் அடைக்கப்படவோ அல்லது மரண தண்டனைக்கு உள்ளாக்கப்படவோ கூடாது என்று சர்வதேச மன்னிப்புச்சபை கூறியுள்ளது.
இதற்கிடையில், அனோஜன் சிவராசா தடுத்து வைக்கப்பட்டுள்ள சிறையை, அவரது நிலை குறித்து விசாரிப்பதற்காக சவூதி அரேபியாவிற்கான இலங்கைத் தூதர் இன்று (08) பார்வையிட உள்ளார்.
சிறையில் இருந்தபோது மற்றொரு கைதியால் அனோஜன் தாக்கப்பட்டு காயமடைந்த சம்பவம் குறித்து விசாரிக்க, தம்மாமில் உள்ள சிறைக்குத் தூதர் செல்ல உள்ளதாகத் தெரிவிக்கப்பட்டுள்ளது.
இதற்கிடையில், சிவராசா அனோஜனுக்கு விதிக்கப்பட்ட மரண தண்டனைக்கு எதிராக அந்நாட்டின் உச்ச நீதிமன்றத்தில் மேல்முறையீடு செய்வதற்காக சவூதி அரேபியாவுக்குச் சென்ற இலங்கைத் தூதுக்குழு, இன்று இவ்விஷயம் குறித்து விசாரிக்க உள்ளது.
நாடாளுமன்ற உறுப்பினர் ஃபைசர் முஸ்தபா, நேற்று (07) அந்நாட்டின் வழக்கறிஞர்களிடம் சட்ட ஆலோசனை பெற்றதாகத் தெரிவித்தார்.
அனோஜனின் மேல்முறையீடு 17ஆம் தேதிக்கு முன்னர் தாக்கல் செய்யப்படும் என எதிர்பார்க்கப்படுவதாக நாடாளுமன்ற உறுப்பினர் ஃபைசர் முஸ்தபா கூறினார்.