புதுச்சேரி அணியின் கேப்டன் மற்றும் ஆல்-ரவுண்டர் அமன் கான், விஜய் ஹசாரே டிராபி தொடரில் ஒரு சோகமான சாதனையைப் பதிவு செய்துள்ளார். ஜார்க்கண்டிற்கு எதிரான போட்டியில், அவர் வீசிய 10 ஓவர்களில் 123 ரன்களை விட்டுக் கொடுத்தார். ஆண்கள் ஒருநாள் லிஸ்ட் ஏ கிரிக்கெட் வரலாற்றில், இதுவே ஒரு இன்னிங்ஸில் அதிக ரன்களை வழங்கிய மோசமான பந்துவீச்சாகப் பதிவாகியுள்ளது.
அகமதாபாத்தில் நடந்த இந்தப் போட்டியில், குமார் குஷக்ராவின் சதம் மற்றும் அனுகுல் ராயின் 98 ரன்களுடன் ஜார்க்கண்ட் அணி 7 விக்கெட்டுகளை இழந்து 368 ரன்கள் குவித்தது. புதுச்சேரி பந்துவீச்சாளர்களில் முழு 10 ஓவர்களையும் வீசிய மூவரில் அமன் கான் ஒருவர். ஆனால், அவரது எக்கானமி ரேட் 12.3 ஆக இருந்தது. பதிலுக்கு ஆடிய புதுச்சேரி அணி 41.4 ஓவர்களில் 235 ரன்களுக்கு ஆட்டமிழந்தது.
இந்த மோசமான சாதனையை ஏற்படுத்துவதற்கு முன்பு, ஆண்கள் ஒருநாள் போட்டிகளில் அதிக ரன்களை வாரி வழங்கிய சாதனை அருணாச்சலப் பிரதேசத்தின் மிபோம் மோசு வசம் இருந்தது. அவர் இந்த மாத தொடக்கத்தில், இதே விஜய் ஹசாரே தொடரில் பீஹாருக்கு எதிராக 9 ஓவர்களில் 116 ரன்களை வழங்கியிருந்தார். அந்தப் போட்டி, 14 வயதான பீகாரின் வைபவ் சூர்யவன்ஷி, ஒருநாள் சதம் அடித்து இளம் வீரர் என்ற சாதனையையும் படைத்ததால் கவனத்தை ஈர்த்தது.
அமன் கான், 2021 இல் மும்பை அணிக்காகவும், பின்னர் புதுச்சேரி அணிக்காகவும் லிஸ்ட்-ஏ கிரிக்கெட்டில் அறிமுகமானார். சமீபத்தில் நடைபெற்ற ஐபிஎல் 2026 ஏலத்தில், சென்னை சூப்பர் கிங்ஸ் அணி அவரை ₹40 லட்சத்திற்குத் தேர்வு செய்தது. அவர் 2023 சீசனில் டெல்லி கேப்பிடல்ஸ் அணிக்காகவும், 2022 இல் கொல்கத்தா நைட் ரைடர்ஸ் அணிக்காகவும் ஐபிஎல் போட்டிகளில் விளையாடியுள்ளார்.
நேற்று விஜய் ஹசாரே கோப்பையில் சிஎஸ்கே பவுலர்கள் ராமசந்திரன் கோஷ் 7 விக்கெட்டுகளையும், அன்சூல் காம்போஜ் 3 விக்கெட்டுகளையும் வீழ்த்தி இருந்தார். இதே போன்று பிக்பேஷ் லீக் தொடரில் நாதன் எல்லிஸ் டெத் ஓவரில் 2 விக்கெட் உள்பட 3 விக்கெட் எடுத்த நிலையில், சிஎஸ்கே ரசிகர்கள் மகிழ்ச்சியில் இருந்தனர். ஆனால் அமன் கான் இந்த பவுலிங் கொஞ்சம் சோகத்தை ஏற்படுத்தியுள்ளது.
#CricketNews #VijayHazareTrophy #AmanKhan #CSK #IPL2026 #ListA #CricketRecord #PuducherryCricket #IPLUpdate #WhistlePodu
