பிரிட்டிஷ் பிரதமர் பதவியை ராஜினாமா செய்வதாக அறிவித்த பிறகு, கெய்ர் ஸ்டாமர் விரைவில் 10 டவுனிங் தெருவை விட்டு வெளியேறவுள்ள நிலையில் லாரி என்ற பூனை புதிய பிரதமர் வருகைக்காக காத்திருகின்றது.
ஐக்கிய இராச்சிய அரசாங்கத்தின் அதிகாரப்பூர்வ “தலைமைப் பூனை வேட்டைக்காரர்” என்று அழைக்கப்படும் லாரி, 2011 முதல் டவுனிங் தெருவில் வசித்து வருகிறது. தற்போது தனது ஏழாவது பிரதமரை வரவேற்கத் தயாராகி வருகிறது.
கடந்த 15 ஆண்டுகளில், லாரி பிரிட்டிஷ் அரசியலில் மிகவும் அறியப்பட்ட முகங்களில் ஒன்றாக மாறியுள்ளது. ஆறு பிரதமர்களையும் எண்ணற்ற அரசியல் நெருக்கடிகளையும் கடந்து அது நிலைத்து நிற்கிறது.
19 வயதான இந்தப் பூனையை, அப்போதைய பிரதமர் டேவிட் கமரூன் மற்றும் அவரது மனைவி சமந்தா ஆகியோர் பிப்ரவரி 2011இல் பேட்டர்சீ நாய் மற்றும் பூனையை இல்லத்திலிருந்து தத்தெடுத்தனர்.
அப்போது, டவுனிங் தெருவிற்கு லாரியை வரவேற்பதில் மகிழ்ச்சி அடைவதாகவும், இந்தப் பூனை அந்தப் புகழ்பெற்ற முகவரியில் ஒரு பிரபலமான அங்கமாக மாறும் என்ற நம்பிக்கையையும் கமரூன் வெளிப்படுத்தினார்.
தன்னுடன் பணியாற்றும் பிரதமர்களைப் போலல்லாமல், லாரி எந்தவொரு அரசியல் தலைவருக்கும் சொந்தமானதல்ல. மாறாக, அவர் எண் 10இன் அதிகாரப்பூர்வ குடியிருப்பாளராகக் கருதப்படுகிறார் மற்றும் ‘தலைமை எலி வேட்டைக்காரர்’ என்ற பட்டத்தை வகிக்கிறார். இந்தப் பதவியானது, பிரதமரின் இல்லத்தைச் சுற்றியுள்ள கொறித்துண்ணிகளின் எண்ணிக்கையைக் கட்டுப்படுத்த உதவுவதை உள்ளடக்கியது.
அரச கட்டடடங்களில் பூனைகளை வளர்க்கும் பாரம்பரியம் ஒரு நூற்றாண்டுக்கும் மேலாகப் பழமையானது. அரச மற்றும் அரசு சொத்துக்களில் பூனைகள் வசித்ததற்கான பதிவுகள் எட்டாம் ஹென்றி மன்னரின் ஆட்சி காலம் வரை நீண்டுள்ளன. 1989 முதல் 1997இல் ஓய்வு பெறும் வரை பணியாற்றிய ஹம்ப்ரிக்குப் பிறகு, டவுனிங் தெருவின் முதல் அதிகாரபூர்வ பூனையாக லாரி ஆனது.
தற்போது 90 மனித ஆண்டுகளுக்குச் சமமான வயதைக் கடந்துள்ள லாரி, சுற்றுலாப் பயணிகள், பத்திரிகையாளர்கள் மற்றும் அரசியல் பார்வையாளர்களிடையே ஒரு பிரபலமான ஈர்ப்பாகத் திகழ்கிறது. எண் 10-இன் சின்னமான கருப்புக் கதவுக்கு வெளியே ஓய்வெடுப்பதும், புறாக்களைத் துரத்துவதும், அல்லது முக்கிய அரசியல் நிகழ்வுகளின் போது திடீரெனத் தோன்றுவதும் இதன் சிறப்பு.
ஸ்டாமரின் வெளியேற்றத்துடன், பிரிட்டனின் அரசியல் களம் மற்றொரு மாற்றத்திற்குத் தயாராகிறது. இருப்பினும், பிரிட்டிஷ் அரசியலின் சுழலும் கதவு மீண்டும் ஒருமுறை சுழலும் நிலையில், டவுனிங் தெருவின் நீண்டகால குடியிருப்பாளராக லாரி தனது கடமைகளைத் தொடரும் என குறிப்பிடப்பட்டுள்ளது.