அமெரிக்க அதிபர் டொனால்ட் ட்ரம்ப் தப்பியோடிய தொழிலதிபர் லோ டேக் ஜோவுக்கு மன்னிப்பு வழங்கினாலும், அவர் மீதான மலேசியாவின் நிலைப்பாடு மாறாது என பிரதமர் அன்வர் இப்ராஹிம் தெரிவித்தார். அமெரிக்காவில் மன்னிப்பு வழங்குவது குறித்த எந்தவொரு முடிவும் அந்த நாட்டின் விஷயம் என்று அன்வர் கூறினார், ஆனால் மலேசியா தனது சொந்த சட்ட செயல்முறைகள் மூலம் லோ மீது தொடர்ந்து நடவடிக்கை எடுக்கும் என்று அவர் வலியுறுத்தினார் என பெரித்தா ஹரியான் செய்தி வெளியிட்டுள்ளது.
மலேசியாவின் நிலைப்பாடு தெளிவாக உள்ளது. நாங்கள் சட்டத்தின் ஆட்சியைப் பின்பற்றுவோம். அது (மன்னிப்பு) அமெரிக்காவின் முடிவு மற்றும் அதன் சொந்த விஷயம், ஆனால் அந்த நாட்டின் முடிவால் எங்கள் நிலைப்பாடு பாதிக்கப்படாது அல்லதுய பலவீனப்படுத்தப்படாது என்று செராஸில் வெள்ளிக்கிழமை தொழுகைக்குப் பிறகு அவர் கூறியதாக மேற்கோள் காட்டப்பட்டுள்ளது. நாளை அமெரிக்க சுதந்திரத்தின் 250ஆவது ஆண்டு நிறைவைக் குறிக்கும் வகையில், “250 ஆண்டுகளுக்கு 250 மன்னிப்புகள்” என்றழைக்கப்படும் ஒரு முன்முயற்சியின் கீழ், ட்ரம்ப் மன்னிப்பு வழங்க பரிசீலிக்கக்கூடிய சுமார் 250 நபர்களில் லோவும் ஒருவர் என்று அனைத்துலக ஊடகங்கள் செய்தி வெளியிட்டிருந்தன.
இந்த விவாதங்கள் குறித்து அறிந்த வட்டாரங்களை மேற்கோள் காட்டி, தி அட்லாண்டிக் இதழ் இந்த முன்முயற்சியை முதன்முதலில் வெளியிட்டது. இருப்பினும், இந்த மாபெரும் மன்னிப்புத் திட்டம் தொடர வேண்டுமா என்பது குறித்து ட்ரம்பின் ஆலோசகர்கள் மத்தியில் கருத்து வேறுபாடு நிலவுவதாகவும் அது கூறியது. இந்தச் செய்தியைத் தொடர்ந்து, ஒரு வெள்ளை மாளிகை அதிகாரி அந்தப் பத்திரிகையிடம், அனைத்து மன்னிப்புகள் குறித்தும் ட்ரம்பே இறுதி முடிவெடுப்பவராக இருந்தாலும், லோ உட்பட பெயரிடப்பட்ட நபர்கள் “மன்னிப்புக் குழுவின் கவனத்தில் இல்லை” என்று கூறினார்.
லோவுக்கான மன்னிப்பு தொடர்பான எந்தவொரு விஷயத்திலும் மலேசியா கவனம் செலுத்தாது அல்லது பரிசீலிக்காது என்று அன்வர் முன்னதாகக் கூறியிருந்தார். வரலாற்றிலேயே மிகப்பெரிய நிதி மோசடிகளில் ஒன்றாகக் கருதப்படும் 1MDB நிதி ஊழலின் மூளையாகச் செயல்பட்டவர் லோ என்று அமெரிக்க அதிகாரிகள் குற்றம் சாட்டுகின்றனர். 1MDB நிதியிலிருந்து சுமார் 4.5 பில்லியன் அமெரிக்க டாலர் (17.7 பில்லியன் மலேசிய ரிங்கிட்) கையாடல் செய்ததாக 2018இல் அவர் மீது குற்றம் சாட்டப்பட்டது; அவர் இன்னும் தலைமறைவாக உள்ளார் மற்றும் அதிகாரிகளால் தேடப்பட்டு வருகிறார்.