சீனாவும் அமெரிக்காவும் போட்டி போடாமல் நட்பு நாடுகளாக இருக்கவேண்டும் என்று சீன அதிபர் ஜி ஜின்பிங் கூறியிருக்கிறார் என சீன அரசு செய்தி நிறுவனம் தெரிவித்துள்ளது.
ட்ரம்புக்கு சீன அதிபர் வைத்த இந்தக் கோரிக்கையால் சீனா – அமெரிக்கா உறவில் புதிய திருப்பம் ஏற்பட்டுள்ளதாக புவி அரசியல் நோக்கர்களால் கூறப்படுகிறது.
பத்தாண்டுகளுக்கும் மேலான இடைவெளிக்குப் பிறகு, சீன அதிபர் ஜி ஜின்பிங் 3 நாள் பயணமாக அமெரிக்கா சென்றுள்ளார். தனி விமானம் மூலம் வாஷிங்டன் அருகே உள்ள ஜாயின்ட் பேஸ் ஆண்ட்ரூஸ் விமானப்படைத் தளத்துக்கு நேற்று வருகை தந்த ஜி ஜின்பிங்கை அமெரிக்க அதிபர் டொனால்டு ட்ரம்ப் நேரில் சென்று வரவேற்றார்.
இந்நிலையில், அதிபர் ஜி ஜின்பிங்கின் கருத்தை செய்தியாக வெளியிட்டுள்ள சீன அரசு செய்தி நிறுவனமான Xinhua. “நமது இரண்டு நாடுகளும் போட்டியாளர்களாக இருப்பதை விட கூட்டாளிகளாக இருக்க வேண்டும். சீனா மற்றும் அமெரிக்க மக்கள் நீண்ட கால நட்புறவை கொண்டுள்ளனர்
அதிபர் ட்ரம்ப் உடனான சந்திப்பில் இருதரப்பு உறவு மற்றும் உலகளாவிய சூழல் குறித்து பேச உள்ளோம். கூட்டாண்மை மூலம் நிலையான உறவு, எல்லைக்கு உட்பட்ட போட்டி, கையாளக்கூடிய வகையிலான கருத்து வேறுபாடு இதில் முக்கியம்” என்று தெரிவித்துள்ளது.
இதை ஏற்கும் வகையில் ட்ரம்ப் பேசியுள்ளார். சீனா மற்றும் அமெரிக்காவின் வல்லமை மிகவும் முக்கியத்துவம் கொண்டது. இது நம் இலக்குகளை அடைய உதவும். இதற்கு சரியான பாதை வகுப்பது அவசியம். இந்த கூட்டு முயற்சியின் மூலம் அதன் பலன், மக்களின் நலன் மற்றும் உலக அமைதியில் புதிய நம்பிக்கையை ஏற்படுத்தும் என்று நம்புவதாக அவர் கூறினார் என சீன அரசு செய்தி நிறுவனம் தெரிவித்துள்ளது.