ஐ. நா. மனித உரிமைகள் பேரவையில் வியாழக்கிழமை சமர்ப்பிக்கப்பட்ட அறிக்கையின்படி, மார்ஷல் தீவுகளில் அமெரிக்கா ஏற்படுத்திய அணுசக்தி பாதிப்புகளின் வடுக்களுக்கு நிவாரணம் வழங்கும் வகையில், மருத்துவச் சேவைகளை வழங்குவதோடு இரகசிய ஆவணங்களையும் அமெரிக்கா வெளியிட வேண்டும் என வலியுறுத்தப்பட்டுள்ளது.
மத்திய பசிபிக் பெருங்கடலில் உள்ள தாழ்வான பவளத் தீவுக் கூட்டங்களான மார்ஷல் தீவுகளில், 1946 முதல் 1958 வரையிலான காலத்தில், 1954-இல் பிகினி அடோலில் நடத்தப்பட்ட “காஸில் பிராவோ” (Castle Bravo) சோதனை உட்பட 67 அணுஆயுதச் சோதனைகளை அமெரிக்கா நடத்தியது.
இந்தச் சோதனைகளால் ஏற்பட்ட மனித இழப்புகளும் பாதிப்புகளும் “கடுமையாகவும் நீடித்ததாகவும்” உள்ளதாகக் குறிப்பிட்ட ஐ.நா மனித உரிமைகள் அலுவலக அறிக்கை, இதுவரையிலும் இதற்கு நியாயமான தீர்வு எட்டப்படவில்லை என்றும் சுட்டிக்காட்டியுள்ளது.
இது குறித்து ஜெனீவாவிலுள்ள அமெரிக்கத் தூதரகமும், அமெரிக்க வெளியுறவுத் துறையும் உடனடியாக கருத்து எதுவும் தெரிவிக்கவில்லை.
இரண்டாம் உலகப் போருக்குப் பிறகு இந்தப் பசிபிக் தீவுகளைத் தன் நிர்வாகத்தின் கீழ் வைத்திருந்த அமெரிக்கா, அனைத்துக் கோரிக்கைகளுக்கும் ஏற்கனவே முழுமையான தீர்வு காணப்பட்டுவிட்டதாகவும், பாதிக்கப்பட்ட சமூகங்களுக்கு 600 மில்லியன் டாலருக்கும் அதிகமான தொகையை வழங்கியுள்ளதாகவும் முன்னதாகத் தெரிவித்திருந்தது.
ஜெனீவாவில் உள்ள ஐ.நா மனித உரிமைகள் பேரவையில் உரையாற்றிய மனித உரிமைகள் துணை உயர் ஆணையர் அவா டாபோ (Awa Dabo), “ஏற்பட்டுள்ள பாதிப்புகள் சீரமைக்கப்பட வேண்டும்” என்று கூறினார்.
அதிகரித்து வரும் புற்றுநோய் பாதிப்புகள், கதிர்வீச்சுக்கு உள்ளான பகுதிகளிலிருந்து வெளியேற்றப்பட்டமை மற்றும் கதிர்வீச்சால் பாதிக்கப்பட்ட மக்கள் “நச்சு மனிதர்கள்” (poison people) என அழைக்கப்பட்டுச் சமூகத்தில் எதிர்கொள்ளும் நீடித்த அவப்பெயர்கள் எனத் தொடரும் பாதிப்புகள் குறித்து ஐ.நா தனது அறிக்கையில் சுட்டிக்காட்டியுள்ளது.
பாதிக்கப்பட்ட மக்களுக்கு மருத்துவச் சிகிச்சை அளிப்பதுடன், அணுசக்திச் சோதனைகள் தொடர்பான அனைத்து இரகசிய ஆவணங்களையும் அமெரிக்கா பகிரங்கப்படுத்த வேண்டும் என்றும் அந்த அறிக்கை கோரியுள்ளது.
பிகினி தீவிலிருந்து இடம்பெயர்ந்து, தனது பெற்றோர் இருவரையும் புற்றுநோயால் இழந்த அல்சன் கெலன் உள்ளிட்ட மார்ஷல் தீவுவாசிகள் பேரவையில் உரையாற்றுகையில், இந்த வரலாற்று வடுக்களுக்குப் பொருள்செறிந்த நியாயமான தீர்வு வேண்டும் எனக் கோரிக்கை விடுத்தனர்.
மார்ஷல் தீவுகளின் பிரதிநிதியான செனட்டர் டேவிட் அனிடோக், ஐ.நா அமைப்பிடம் பேசுகையில்: “பயனுள்ள நிவாரணம் தொடர்ந்து மறுக்கப்படுவதால், உதவி கேட்டு இந்தப் பேரவையின் முன் நிற்க வேண்டிய நிலைக்கு நாங்கள் தள்ளப்பட்டுள்ளோம்” என்று தெரிவித்தார்.
இஸ்ரேலுக்கு எதிரான பாகுபாடு காட்டுவதாகக் கூறி, கடந்த ஆண்டு ஐ.நா மனித உரிமைகள் பேரவையிலிருந்து வாஷிங்டன் விலகியதால், வியாழக்கிழமை நடைபெற்ற கூட்டத்தில் அமெரிக்காவிற்கான இடம் காலியாகவே இருந்தது.