கனடாவின் அல்பர்ட்டா மாகாணத்தில் உள்ள வெய்ன்ரைட் இராணுவப் பயிற்சித் தளத்தில் ஏற்பட்ட தீ விபத்தில் நான்கு பேர் உயிரிழந்துள்ளதுடன் 39 பேர் மருத்துவமனையில் அனுமதிக்கப்பட்டுள்ளனர்.
மருத்துவமனையில் அனுமடிக்கப்பட்டவர்களில் 19 பேர் கவலைக்கிடமான நிலையில் இருப்பதாக மாகாண முதல்வர் டேனியல் ஸ்மித் தெரிவித்துள்ளார்.
சனிக்கிழமை மாலை சுமார் 4 மணியளவில் இந்தத் தீ விபத்து ஏற்பட்டது. அப்போது, கனடிய இராணுவத்தின் பயிற்சித் தளத்தில் பல்வேறு பயிற்சி நடவடிக்கைகள் நடைபெற்றுக் கொண்டிருந்தன.
பயிற்சிப் பகுதியில் ஏற்பட்ட புல்வெளித் தீ, பலத்த காற்று காரணமாக வேகமாகப் பரவி, இராணுவத் தளத்தின் நிர்வாகப் பகுதியை நோக்கிச் சென்றதாக இராணுவ அதிகாரிகள் தெரிவித்துள்ளனர்.
தீ விபத்துக்கான காரணம் குறித்து விசாரணைகள் முன்னெடுக்கப்பட்டு வருகின்றன.
தீ விபத்தில் காயமடைந்தவர்கள் எட்மண்டன் உள்ளிட்ட நகரங்களிலுள்ள மருத்துவமனைகளில் அனுமதிக்கப்பட்டுள்ளனர். காயமடைந்தவர்களின் எண்ணிக்கை அதிகமாக இருப்பதால், அப்பகுதியிலுள்ள மருத்துவமனைகள் கடும் நெருக்கடியை எதிர்கொள்வதாக மருத்துவர்கள் தெரிவித்துள்ளனர்.
காயமடைந்தவர்களுக்குத் தேவையான மருத்துவ உதவிகள் தொடர்ந்து வழங்கப்பட்டு வருகின்றன.
இந்தச் சம்பவம் குறித்து கனடா பிரதமர் மார்க் கார்னி ஆழ்ந்த வருத்தம் தெரிவித்துள்ளார். அமைதிக் காலத்தில் இராணுவம் எதிர்கொண்ட மிக மோசமான துயரச் சம்பவங்களில் இதுவும் ஒன்று என அவர் குறிப்பிட்டுள்ளார்.
உயிரிழந்தவர்களின் குடும்பங்களுக்கு இரங்கல் தெரிவித்த பிரதமர், காயமடைந்த இராணுவ வீரர்களுக்குத் தேவையான உதவிகள் வழங்கப்படும் என்றும் உறுதியளித்துள்ளார்.
இதற்கிடையில், வெய்ன்ரைட் இராணுவத் தளத்தைச் சுற்றியுள்ள பகுதிகளிலும் தீ பரவியுள்ளதாகத் தெரிவிக்கப்பட்டுள்ளது. அவசரகால மீட்புக் குழுவினர் மீட்பு ஈடுபட்டு வருகின்றனர்.