பாகிஸ்தான் ராவல்பிண்டியில் இலங்கைக்கு எதிராக நடைபெற்ற ஒருநாள் சர்வதேச கிரிக்கெட் போட்டியில், இங்கிலாந்து அணியின் தலைவர் ஹரி புரூக் (Harry Brook) அதிரடியாக 202 ஓட்டங்களைக் குவித்து, ஒருநாள் போட்டியில் இரட்டைச் சதமடித்த முதல் இங்கிலாந்து வீரர் என்ற வரலாற்று சாதனையைப் படைத்துள்ளார்.
புரூக்கின் இந்த வியத்தகு ஆட்டத்தின் மூலம், 2023 ஆம் ஆண்டு ‘தி ஓவல்’ மைதானத்தில் நியூசிலாந்துக்கு எதிராக பென் ஸ்டோக்ஸ் (Ben Stokes) அடித்த 182 ஓட்டங்களே இதுவரை இங்கிலாந்து வீரர் ஒருவரின் அதிகபட்ச ஒருநாள் ஓட்டங்களாக இருந்த சாதனையை அவர் முறியடித்துள்ளார்.
மேலும், 114 பந்துகளில் 200 ஓட்டங்களை எட்டியதன் மூலம், ஒருநாள் சர்வதேச போட்டிகளில் அதிவேக இரட்டைச் சதமடித்த வீரர் என்ற உலகச் சாதனையையும் புரூக் படைத்துள்ளார். கடந்த மாதம் மேற்கிந்தியத் தீவுகளுக்கு எதிராக இந்தியாவின் சுப்மன் கில் (Shubman Gill) 117 பந்துகளில் இரட்டைச் சதமடித்ததே இதுவரை அதிவேக சாதனையாக இருந்தது. தற்போது, ஹாரி புரூக் அதனை முறியடித்துள்ளார்.
இன்னிங்ஸின் கடைசிப் பந்தில் ஆட்டமிழந்த புரூக், ஆண்களுக்கான ஒருநாள் சர்வதேச போட்டிகளில் 14வது இரட்டைச் சதத்தைப் பதிவு செய்ததுடன், ஒருநாள் போட்டிகளில் தனிநபர் அடித்த 12வது அதிகபட்ச ஓட்டங்களையும் பதிவு செய்தார்.
இங்கிலாந்து தலைவரின் இந்த அதிரடி ஆட்டத்தால் நிலைகுலைந்த இலங்கை பந்துவீச்சை எதிர்கொண்டு, இங்கிலாந்து அணி 4 விக்கெட் இழப்பிற்கு 429 ஓட்டங்கள் என்ற பிரமாண்டமான ஓட்ட எண்ணிக்கையைக் குவித்தது. இது பாகிஸ்தான் மண்ணில் ஒருநாள் சர்வதேச போட்டியில் பெறப்பட்ட அதிகபட்ச அணிக்கான ஓட்ட எண்ணிக்கையாகும்.