சீனாவின் ஆளும் கம்யூனிஸ்ட் கட்சி, பெய்ஜிங்கில் முக்கிய மத்திய குழுக் கூட்டம் நடைபெறுவதற்கு முன்னதாக, ஆறு மாகாணங்களில் முக்கிய நிர்வாக நியமனங்களையும் தலைமை மாற்றங்களையும் அறிவித்துள்ளது.
ஒக்டோபர் 26 முதல் 29 வரை நடைபெறவுள்ள இந்தக் கூட்டத்தில், கட்சி நிர்வாகம், ஒழுக்கம் மற்றும் முக்கிய அரசியல் விவகாரங்கள் குறித்து ஆராயப்படும் என எதிர்பார்க்கப்படுகிறது.
இதன்படி, தெற்கு ஹுனான் மாகாணத்தின் கம்யூனிஸ்ட் கட்சிச் செயலாளராக வாங் ஜிஜுன் நியமிக்கப்பட்டுள்ளார்.
தென்மேற்கு யுன்னான் மாகாணத்தின் கட்சிச் செயலாளராக மோ காயி நியமிக்கப்பட்டுள்ளார். இதற்கு முன்னர் ஹுனான் மாகாணத்தின் கட்சிச் செயலாளராக ஷென் சியாவோமிங்கும், யுன்னானில் வாங் நிங்கும் பதவி வகித்தனர்.
மேலும், ஹுனான் மாகாணத்தின் துணைக் கட்சிச் செயலாளரான ஷியே வெய்ஜியாங், மாகாண அரசாங்கத்தின் கட்சிக் குழுத் தலைவராக நியமிக்கப்பட்டுள்ளார். இதன் மூலம் அவர் மாகாண ஆளுநராகப் பொறுப்பேற்கக்கூடும் என எதிர்பார்க்கப்படுகிறது.
புஜியான் மாகாணத்தின் துணைக் கட்சிச் செயலாளரும் பூசோ நகரின் கட்சித் தலைவருமான குவோ நிங்னிங், மாகாண அரசாங்கத்தின் கட்சிக் குழுத் தலைவராக நியமிக்கப்பட்டுள்ளார். அவரும் ஆளுநராகப் பொறுப்பேற்க வாய்ப்புள்ளது. இதேபோன்று, கிங்ஹாய், ஜியாங்சி மற்றும் ஹெபெய் மாகாணங்களிலும் புதிய தலைமைப் பொறுப்புகளுக்கான நியமனங்கள் அறிவிக்கப்பட்டுள்ளன.
இந்த நியமனங்களில் சில, தற்போதைய ஆளுநர்களுக்குப் பதிலாக புதியவர்கள் பொறுப்பேற்கும் வகையில் அமைந்துள்ளன. இருப்பினும், ஆளுநர் நியமனங்கள் நடைமுறைக்கு வருவதற்கு அந்தந்த மாகாணச் சட்டமன்றங்களின் முறையான ஒப்புதல் அவசியமாகும். பொதுவாக, கட்சியின் முடிவைத் தொடர்ந்து இந்த ஒப்புதல் நடைமுறை இடம்பெறும்.
சீனக் கம்யூனிஸ்ட் கட்சியின் ஐந்தாவது மத்திய குழுக் கூட்டம், 2027ஆம் ஆண்டு நடைபெறவுள்ள கட்சியின் அடுத்த மாநாட்டுக்கு முன்னதாக இடம்பெறுவதால், தற்போதைய தலைமை மாற்றங்கள் அரசியல் முக்கியத்துவம் வாய்ந்தவையாகக் கருதப்படுகின்றன. கட்சியின் நிர்வாகக் கட்டுப்பாடு மற்றும் ஒழுக்கத்தை வலுப்படுத்துவது கூட்டத்தின் முக்கிய எதிர்பார்ப்புகளில் ஒன்றாகும்.