கனடாவைச் சேர்ந்த எழுத்தாளர் ஆன் கார்சனுக்கு இலக்கியத்துக்கான நோபல் பரிசு அறிவிக்கப்பட்டுள்ளது.
பாரம்பரிய இலக்கிய மரபோடு ஒரு விளையாட்டுத்தனமான உரையாடலை நிகழ்த்தி, சமகால இலக்கியத்துக்கு புதிய வடிவங்களை உருவாக்கிய துணிச்சலான மற்றும் புதுமையான படைப்புகளுக்காக கனடா எழுத்தாளர் ஆன் கார்சனுக்கு இலக்கியத்துக்கான நோபல் பரிசு வழங்கப்படுவதாக ஸ்டாக்ஹோமில் உள்ள ஸ்வீடிஷ் அகாடமி அறிவித்தது. இந்தப் பரிசின் மதிப்பு 12 மில்லியன் ஸ்வீடிஷ் கிரவுன்கள் (1.2 மில்லியன் அமெரிக்க டாலர்கள்) ஆகும்.
ஆன் கார்சன் 1990-களில் பல குறிப்பிடத்தக்க படைப்புகளை வெளியிட்டார். தனது ஒட்டுமொத்த எழுத்துப் பயணத்திலும் கவனத்துக்குரிய பாணியில் படைப்புகளை உருவாக்கியவர் ஆன் கார்சன்.
கனடாவை சேர்ந்த கவிஞரும் கட்டுரையாளருமான ஆன் கார்சனின் படைப்புகள் பெரும்பாலும் கவிதை, உரைநடை, உரையாடல் மற்றும் மொழிபெயர்ப்பு ஆகியவற்றை ஒன்றிணைத்து, எந்தவொரு குறிப்பிட்ட இலக்கிய வகைக்குள்ளும் அடங்காத ஒரு கலவையாக அமைகின்றன.
செவ்வியல் கிரேக்க இலக்கியத்தின் மொழிபெயர்ப்புகளுக்காக அவர் பரவலாக அறியப்படுகிறார். இந்த இலக்கிய மரபு அவரது படைப்புகளில் பெரும் தாக்கத்தை ஏற்படுத்துகிறது. ஓபரா இசை நாடகங்களுக்கான உரை (libretti) முதல் இலக்கிய விமர்சனம் மற்றும் 1998-ல் வெளியான ‘ஆட்டோபயோகிராபி ஆஃப் ரெட்’ போன்ற கவிதை நாவல்கள் வரை அவரது படைப்புகள் பெரும் வரவேற்பை பெற்றன.
அவரது எழுத்து நடைக்கு சிறந்த உதாரணமாக 2019-ல் வெளியான ‘நார்மா ஜீன் பேக்கர் ஆஃப் ட்ராய்’ (Norma Jeane Baker of Troy) என்ற நிகழ்த்துக் கலைப் படைப்பைக் குறிப்பிடலாம். இது யூரிபிடிஸின் ‘ஹெலன்’ நாடகத்தில் வரும் ட்ராய் நகரின் ஹெலன் பற்றிய கதையையும், மர்லின் மன்றோவின் கதையையும் ஒன்றிணைக்கிறது என்று நோபல் பரிசுக் குழு விவரித்துள்ளது.