கனடாவில் ஒவ்வொரு ஆண்டும் பின்பற்றப்படும் பருவகால நேர மாற்றத்தின் படி, நாட்டின் பெரும்பாலான பகுதிகளில் உள்ள மக்கள் இந்த ஞாயிற்றுக்கிழமை அதிகாலை 2:00 மணிக்குத் தங்களது கடிகார முள்ளை ஒரு மணி நேரம் பின்னோக்கி நகர்த்தவுள்ளனர்.
இதன் மூலம் கோடைக் காலத்தில் இழக்கப்பட்ட ஒரு மணி நேரத்தை மக்கள் மீண்டும் பெறுகின்றனர்.
மார்ச் மாதத்தின் இரண்டாவது ஞாயிற்றுக்கிழமை கடிகார முள் ஒரு மணி நேரம் முன்னோக்கி நகர்த்தப்பட்டு ‘பகல்நேர சேமிப்பு நேரம்’ தொடங்கப்பட்ட நிலையில், தற்போது அது முடிவுக்கு வந்து ‘இயல்பு நேரத்திற்கு’ மாறுகிறது.
இந்த வார இறுதியிலிருந்து, ஒன்டாரியோவின் வடமேற்குப் பகுதி மற்றும் வடமேற்கு பிராந்தியங்கள், பிரிட்டிஷ் கொலம்பியா, அல்பெர்ட்டா, மேனிடோபா ஆகிய மாகாணங்கள் நிரந்தர பகல்நேர சேமிப்பு நேரத்திற்கு மாறுகின்றன.
இதனால் இனி ஆண்டிற்கு இருமுறை கடிகார நேரத்தை மாற்ற வேண்டிய அவசியம் இங்கு இருக்காது. இருப்பினும், அட்லாண்டிக் கனடா, கியூபெக், லேப்ரடார் மற்றும் பெரும்பாலான ஒன்டாரியோ பகுதிகளில் வழக்கம் போல் கடிகார முள் ஒரு மணி நேரம் பின்னோக்கித் திருப்பப்படும்.
சஸ்காட்செவன் மற்றும் யூகான் மாகாணங்கள் ஏற்கனவே ஆண்டு முழுமைக்கும் ஒரே இயல்பு நேரத்தைப் பின்பற்றி வருகின்றன. ஆண்டுக்கு இருமுறை நேரத்தை மாற்றுவதும், நிரந்தரமாகப் பகல்நேர சேமிப்பு நேரத்தைப் பின்பற்றுவதும் மனித உடல் ஆரோக்கியத்திற்குப் பல கேடுகளை விளைவிக்கும் என நிபுணர்கள் எச்சரிக்கின்றனர்.