சிதம்பரம் இயக்கத்தில் மலையாளத்தில் வெளியான மஞ்சுமெல் பாய்ஸ் திரைப்படம் தமிழிலும் மிகப்பெரிய வெற்றியை பெற்றுள்ளது. ஒட்டுமொத்தமாக தமிழில் இப்படம் செய்த வசூல் பற்றிய விவரம் தற்போது வெளியாகியுள்ளது.
தமிழில் 2024 ஆம் ஆண்டு வெளியான திரைப்படங்கள் எதுவும் சொல்லிக்கொள்ளும் அளவிற்கு வெற்றியை பெறவில்லை. பொங்கல் பண்டிகையை முன்னிட்டு சிவகார்த்திகேயனின் அயலான், தனுஷின் கேப்டன் மில்லர், அருண் விஜயின் மிஷன், ரஜினியின் லால் சலாம் என ஒரு சில பெரிய படங்கள் வெளியாகியுள்ளன. ஆனால் இப்படங்கள் வசூலில் நல்ல வரவேற்பை பெற்றாலும் விமர்சன ரீதியாக மிகப்பெரிய வெற்றியை பதிவு செய்யவில்லை.
குறிப்பாக ஐஸ்வர்யாவின் இயக்கத்தில் ரஜினி சிறப்பு தோற்றத்தில் நடித்த லால் சலாம் திரைப்படம் மிகப்பெரிய எதிர்பார்ப்பிற்கு மத்தியில் வெளியாகி வெற்றிபெற தவறியது. மேலும் தமிழில் வெளியாகும் சிறு பட்ஜெட் திரைப்படங்களும் ரசிகர்களை பெரிதாக ஈர்க்கவில்லை.
எனவே தான் திரையரங்க உரிமையாளர்கள் அனைவரும் பழைய படங்களை ரீரிலீஸ் செய்தனர். அப்படங்களுக்கு ஓரளவு ரசிகர்களின் ஆதரவு கிடைத்தது. இந்நிலையில் தான் மலையாளத்தில் வெளியாகி மாபெரும் வரவேற்பை பெற்ற மஞ்சுமெல் பாய்ஸ் திரைப்படம் தமிழ்நாட்டிலும் திரையிடப்பட்டது. முதலில் ஒரு சில திரையரங்கங்களில் தான் இப்படம் திரையிடப்பட்டது.
அதன் பிறகு ரசிகர்கள் கொடுத்த ஆதரவின் காரணமாக ஒரு தமிழ் படத்திற்கு இணையாக பல திரையரங்கங்களில் இப்படம் வெளியாகி வெற்றிகரமாக ஓடிக்கொண்டிருக்கிறது. கமலின் குணா குகை, கொடைக்கானல் சுற்றுலா என தமிழ் கனெக்ட் பல இப்படத்தில் இடம்பெற்றிருந்ததால் தமிழ் ரசிகர்களை இப்படம் வெகுவாக ஈர்த்தது.
மேலும் ஒரு உண்மை சம்பவத்தை அடிப்படையாக கொண்டு இப்படம் உருவாக்கப்பட்டது. இவையெல்லாம் தமிழ் ரசிகர்களால் கொண்டாடப்படும் விஷயமாக இருந்தது. எனவே தான் கேரளாவை காட்டிலும் தமிழ்நாட்டில் இப்படம் மிகப்பெரிய வசூலை ஈட்டி வருகின்றது. அந்த வகையில் உலகளவில் இப்படம் 170 கோடி வசூலித்துள்ள நிலையில் தமிழ்நாட்டில் மட்டும் இப்படம் ஐம்பது கோடிக்கு மேல் வசூலித்துள்ளதாம்.
தமிழ்நாட்டில் அதிக வசூலை ஈட்டிய மலையாள திரைப்படம் என்ற பெருமையை மஞ்சுமெல் பாய்ஸ் பெற்றுள்ளது. இது மிகப்பெரிய சாதனையாக கோலிவுட் வட்டாரத்தில் பார்க்கப்படுகின்றது. மேலும் ஒரு படம் நன்றாக இருந்தால் அப்படம் வெற்றிபெறுவதற்கு மொழி ஒரு தடையில்லை என்பதை மஞ்சுமெல் பாய்ஸ் மேலும் ஒருமுறை நிரூபித்துள்ளது.
மேலும் அடுத்த சில வாரங்களுக்கு தமிழில் பெரியளவில் படங்கள் எதுவும் வெளியாகாது என்பதால் மஞ்சுமெல் பாய்ஸ் திரைப்படத்தின் வசூல் மேலும் அதிகரிக்கும் என்றே தெரிகின்றது. இதைத்தொடர்ந்து இனி மலையாளத்தில் சக்கைபோடு போடும் படங்கள் தமிழ்நாட்டிலும் வெளியாகி வரவேற்பை பெரும் என்பது குறிப்பிடத்தக்கது.