கனடாவில் தற்காலிகமாகத் தங்கியுள்ள சர்வதேச மாணவர்கள் மற்றும் வெளிநாட்டுப் பணியாளர்களின் எண்ணிக்கையைக் குறைக்க அரசாங்கம் தீவிர நடவடிக்கை எடுத்து வருவதாக தெரிவிக்கப்படுகின்றது.
இதனால், அங்குள்ள தற்காலிக குடியேறிகள் கடுமையான சவால்களையும் நிச்சயமற்ற எதிர்காலத்தையும் எதிர்நோக்கி வருகின்றனர்.
வீட்டு வசதிப் பற்றாக்குறை மற்றும் பொதுச் சேவை நெருக்கடிகளைக் கட்டுப்படுத்த கனடா அரசு குடியேற்ற அளவைக் குறைத்து வருகின்றது.
சீ.டி. ஹவ் இன்ஸ்டிடியூட் நிபுணர் குழு, தற்காலிக குடியேறிகளின் எண்ணிக்கையை மேலும் குறைக்க வேண்டும் எனவும், அவர்கள் நாட்டை விட்டு வெளியேறுவதைத் துல்லியமாகக் கண்காணிக்க வேண்டும் எனவும் பரிந்துரைத்துள்ளது.
அரசாங்கத்தின் கடுமையான கட்டுப்பாடுகள் காரணமாக, கனடாவிற்கு வரும் புதிய மாணவர்கள் மற்றும் பணியாளர்களின் எண்ணிக்கை வரலாறு காணாத வகையில் சரிந்துள்ளது.
2024ஆம் ஆண்டின் முதல் ஆறு மாதங்களில் 1,24,930 புதிய சர்வதேச மாணவர்கள் கனடாவிற்கு வந்த நிலையில், 2026ஆம் ஆண்டின் அதே காலகட்டத்தில் அந்த எண்ணிக்கை 22,410 ஆகக் கடுமையாகக் குறைந்துள்ளது.
2024 முதல் பாதியில் 2,44,985 ஆக இருந்த புதிய தற்காலிகப் பணியாளர்களின் சேர்க்கை, 2026 முதல் பாதியில் 98,130 ஆகச் சரிந்துள்ளது.
2024 ஒக்ரோபரில் நாட்டின் மொத்த மக்கள் தொகையில் 7 சதவீதத்திற்கும் அதிகமாக இருந்த தற்காலிக குடியேறிகளின் எண்ணிக்கையை, 2027ஆம் ஆண்டின் இறுதிக்குள் 5 சதவீதத்திற்குக் கீழ் குறைக்க அரசு இலக்கு நிர்ணயித்துள்ளது.
ஆனால், நிபுணர் பரிசா மஹ்பூபி இந்த 5 சதவீதத்தை அதிகபட்ச வரம்பாகவே கொள்ள வேண்டும் எனவும், வரலாற்றுச் சராசரியான 3 முதல் 4 சதவீதத்திற்கு இலக்கைக் குறைக்க வேண்டும் எனவும் கூறுகிறார்.
கனடாவில் தற்காலிகமாக வாழும் 25 லட்சம் தற்காலிக குடிமக்களின் எதிர்காலம் கேள்விக்குறியாகியுள்ளது.
ஒட்டுமொத்தமாக, கனடாவின் மாறிவரும் குடியேற்றக் கொள்கைகள், வேலைவாய்ப்புச் சந்தையில் நிலவும் மந்தநிலை மற்றும் கடுமையான விசா கட்டுப்பாடுகள் ஆகியவை கனடாவில் உள்ள தற்காலிக குடியேறிகளின் வாழ்க்கையை பெரும் சவாலுக்கு உள்ளாக்கியுள்ளன.