அமெரிக்காவின் மியாமி சர்வதேச விமான நிலையத்தில் அமேசன் நிறுவனத்தின் சரக்கு விமானம் ஒன்று தரையிறங்கும்போது ஓடுபாதையை விட்டு விலகி, வாகனங்கள் மீது மோதித் தீப்பற்றி எரிந்ததில் குறைந்தது 5 பேர் உயிரிழந்துள்ளதுடன், மேலும் 5 பேர் காயமடைந்தனர் என அதிகாரிகள் தெரிவித்துள்ளனர்.
போர்ட்டோ ரிகோவின் சான் ஜுவானில் இருந்து வந்த ‘அமேசான் பிரைம் ஏர்’ அமைப்பின் போயிங் 767 ரக சரக்கு விமானம், ஞாயிற்றுக்கிழமை பிற்பகல் 2 மணியளவில் ஓடுபாதையைத் தாண்டிச் சென்று அருகிலிருந்த வீதியில் பயணித்த வாகனங்கள் மீது மோதித் தீப்பற்றி எரிந்தது.
இவ்விபத்தில் 5 பேர் உயிரிழந்துள்ளதுடன், 3 பேர் படுகாயமடைந்தும் 2 பேர் லேசான காயங்களுடனும் மருத்துவமனையில் அனுமதிக்கப்பட்டுள்ளனர்.
விமானத்தின் காக்பிட்டில் சிக்கிய விமானிகள் மற்றும் வாகனங்களில் சிக்கியவர்கள் சுமார் 200 மீட்புப் பணியாளர்களால் மீட்கப்பட்டனர்.
உயிரிழந்தவர்கள் விமானத்தில் இருந்தவர்களா அல்லது வாகனங்களில் இருந்தவர்களா என்பது குறித்து இன்னும் தெளிவான தகவல் வெளியாகவில்லை.
இந்த விபத்து காரணமாக மியாமி விமான நிலையத்தில் 160 இற்கும் மேற்பட்ட விமானங்கள் ரத்து செய்யப்பட்டதுடன், 325 இற்கும் மேற்பட்ட விமானங்கள் தாமதமாகின.
விபத்துக்கான காரணம் குறித்து அமெரிக்க தேசிய போக்குவரத்து பாதுகாப்பு வாரியம் விசாரணையைத் தொடங்கியுள்ளது.
விபத்து நடந்த நேரத்தில் அப்பகுதியில் இடியுடன் கூடிய மழையும் மணிக்கு 48 கி.மீ வேகத்தில் பலத்த காற்றும் வீசியதாகக் கூறப்படுகிறது. இச்சம்பவம் குறித்து ஆழ்ந்த இரங்கலைத் தெரிவித்துள்ள அமேசான் நிறுவனம், விசாரணைக்கு முழு ஒத்துழைப்பு வழங்குவதாக அறிவித்துள்ளது.