“கோட்சில்லா விஎஸ் கொங்” (Godzilla vs. Kong) திரைப்படத் தொடரில் ஜியா (Jia) என்ற கதாபாத்திரத்தில் நடித்துப் புகழ்பெற்ற காதுகேளாத நடிகை கெய்லி ஹொட்டில் (Kaylee Hottle), தனது 18 வயதில் அமெரிக்காவின் மேரிலாந்து மாநிலத்தில் நடந்த கார் விபத்தில் உயிரிழந்தார்.
2021 ஆம் ஆண்டு வெளிவந்த பிளாக்பஸ்டர் திரைப்படமான “கோட்சில்லா விஎஸ் கொங்” படத்தில் இளம் அநாதை ஜியாவாக ஹொட்டில் நடித்ததுடன், 2024 ஆம் ஆண்டு வெளியான அதன் தொடர்ச்சியான “கோட்சில்லா எக்ஸ் கொங் : தி நியூ எம்பயர்” (Godzilla x Kong: The New Empire) படத்திலும் அத்தகைய கதாபாத்திரத்தில் மீண்டும் நடித்திருந்தார்.
அவரது தந்தையான ஜோசுவா ஹொட்டில், அமெரிக்க சைகை மொழியைப் பயன்படுத்தி பேஸ்புக்கில் பகிர்ந்து கொண்ட வீடியோ அறிக்கை மூலம் அவரது இறப்பை உறுதிப்படுத்தினார்.
பிரடெரிக் கவுண்டி ஷெரிப் அலுவலகத்தின்படி, மேரிலாந்தின் ஐயம்ஸ்வில் பகுதியில் செவ்வாய்க்கிழமை அதிகாலை 2:50 மணியளவில் இந்த விபத்து நடந்துள்ளது. இந்தச் சம்பவத்தில் ஒரே ஒரு வாகனம் மட்டுமே சம்பந்தப்பட்டுள்ளது என்றும், அதிக வேகம் விபத்திற்குக் காரணமாக இருந்திருக்கலாம் என்றும் காவல்துறை தெரிவித்துள்ளது.
19 வயது ஓட்டுநர் ஆபத்தான கட்டத்தைத் தாண்டிய காயங்களுடன் மருத்துவமனைக்கு அழைத்துச் செல்லப்பட்டார், அதே நேரத்தில் மற்றொரு பயணியே சம்பவ இடத்திலேயே மருத்துவ சிகிச்சையைப் பெற மறுத்துவிட்டார்.
ஹொட்டில் படித்த டெக்சாஸ் காதுகேளாதோர் பாடசாலை, “ஆழ்ந்த சோகத்துடன்” அவரது மறைவை அறிவித்ததுடன், குடும்பத்தினரின் தனியுரிமைக்கு மதிப்பளிக்குமாறும் விபத்து தொடர்பான யூகங்களைத் தவிர்க்குமாறும் பொதுமக்களைக் கேட்டுக் கொண்டது.
கோட்சில்லா எக்ஸ் கொங் படங்களின் தயாரிப்பு நிறுவனமான வோர்னர் பிறதர்ஸ் (Warner Bros.), எக்ஸ் (X) தளத்தில் வெளியிட்ட பதிவில், ரெபேக்கா ஹால், டான் ஸ்டீவன்ஸ் மற்றும் பிரையன் டைரி ஹென்றி ஆகியோருடன் திரையைப் பகிர்ந்துகொண்ட இளம் நடிகைக்கு அஞ்சலி செலுத்தியுள்ளது.
ஜியா கதாபாத்திரத்தில் நடித்ததன் மூலம், ஹொலிவுட் திரை உலகில் காதுகேளாத சமூகத்திற்கான பிரதிநிதித்துவத்தை மேம்படுத்தியதற்காக ஹொட்டில் பரவலாக அறியப்பட்டார்.