பெருவெள்ளத்தால் பாதிக்கப்பட்ட நேபாளத்துக்கு இதுவரை 4 விமானங்களில் 68.5 தொன் நிவாரண பொருட்களை இந்தியா அனுப்பி உள்ளது.
கடந்த 26ஆம் திகதி நேபாளத்தில் பெருவெள்ளம் ஏற்பட்டது. அன்றைய தினமே இந்திய விமானப் படையின் சி-130ஜே ரக சரக்கு விமானம் மூலம் நேபாளத்துக்கு 10 தொன் நிவாரண பொருட்கள் அனுப்பப்பட்டன. கடந்த 27ஆம் திகதி இந்திய விமானப் படையின் சி-17 குளோப்மாஸ்டர் விமானம் மூலம் 37.5 தொன் நிவாரணப் பொருட்கள் நேபாளத்துக்கு அனுப்பி வைக்கப்பட்டன.
இதைத் தொடர்ந்து கடந்த 28ஆம் திகதி சி-130ஜே விமானம் மூலம் 10 தொன் நிவாரணப் பொருட்கள் நேபாள தலைநகர் காத்மாண்டுக்கு அனுப்பி வைக்கப்பட்டன. கடந்த 29ஆம் திகதி இந்திய விமானப் படையின் சரக்கு விமானம் மூலம் மேலும் 11 தொன் நிவாரண பொருட்கள் அனுப்பப்பட்டன.
ஒட்டுமொத்தமாக 4 விமானங்களில் 68.5 தொன் நிவாரணப் பொருட்களை அந்த நாட்டுக்கு இந்தியா அனுப்பி வைத்திருக்கிறது. இதில் போர்வைகள், தார்பாலின் கூடாரங்கள், தூங்குவதற்கான சிறப்பு படுக்கைகள் ஆகியவையும் அடங்கும்.
மேலும் நேபாளம் முழுவதும் பெருவெள்ளத்தால் 40இற்கும் மேற்பட்ட பிரதான பாலங்கள் சேதமடைந்துள்ளன. அங்கு தற்காலிக பாலங்களை அமைக்க இந்தியாவின் உதவியை நேபாள அரசு கோரி உள்ளது. முதல்கட்டமாக 16 லொறிகளில் தற்காலிக இரும்பு பாலங்கள் அமைப்பதற்கான உபகரணங்கள், பொருட்கள் நேபாளத்துக்கு அனுப்பி வைக்கப்பட்டு உள்ளன.