ஷங்கரின் இயக்கத்தில் கமலின் நடிப்பில் உருவாகியுள்ள இந்தியன் 2 திரைப்படத்தின் ரிலீஸ் பற்றிய தகவல் தற்போது கிடைத்துள்ளது. மேலும் கமலின் சென்டிமென்ட் இந்தியன் 2 ரிலீஸிலும் ஒர்கவுட் ஆகுமா ? என்ற கேள்வியும் இருந்து வருகின்றது.
உலகநாயகன் கமல்ஹாசன் விக்ரம் படத்தின் மூலம் தன் அடுத்த இன்னிங்க்ஸை துவங்கியுள்ளார். இடையில் சில காலம் படங்களில் நடிக்காமல் இருந்து வந்த கமல்ஹாசன் விக்ரம் படத்தின் மூலம் தரமான கம்பேக் கொடுத்தார். அதைத்தொடர்ந்து மளமளவென பல படங்களில் நடிக்க கமிட்டாகி வருகின்றார் உலகநாயகன்.
ஷங்கரின் இயக்கத்தில் இந்தியன் 2, மணிரத்னம் இயக்கத்தில் தக்லைப், பிரபாஸின் நடிப்பில் உருவாகும் ப்ராஜெக்ட் கே, அன்பறிவு மாஸ்டர் இயக்கும் படம் என பல படங்களில் நடிக்க கமிட்டாகியுள்ளார் கமல்.
இதில் இந்தியன் 2 திரைப்படத்தின் படப்பிடிப்பை கமல் முடித்துள்ளார். ஷங்கரின் இயக்கத்தில் கமலின் நடிப்பில் 1996 ஆம் ஆண்டு வெளியாகி மாபெரும் வெற்றிபெற்ற திரைப்படம் தான் இந்தியன். இப்படத்தின் இரண்டாம் பாகம் உருவாக இருப்பதாக கடந்த 2017 ஆம் ஆண்டு அறிவிக்கப்பட்டது.
அதன் பிறகு 2020 ஆம் ஆண்டு இந்தியன் 2 படப்பிடிப்பு துவங்கிய நிலையில் படப்பிடிப்பு தளத்தில் ஏற்பட்ட விபத்து, கொரோனா ஊரடங்கு, தயாரிப்பாளர் மற்றும் இயக்குனர் இடையே எழுந்த பிரச்சனை என பல காரணங்களால் இப்படம் கிடப்பில் போடப்பட்டது.
கிட்டத்தட்ட இந்தியன் 2 கைவிடப்பட்டதாகவே பலர் கூறிய நிலையில் விக்ரம் வெற்றிக்கு பிறகு மீண்டும் இந்தியன் 2 படப்பிடிப்பை துவங்கினார் கமல். 2022 ஆம் ஆண்டு இந்தியன் 2 திரைப்படத்தின் படப்பிடிப்பு மீண்டும் துவங்கப்பட்ட நிலையில் இப்படம் தற்போது இரண்டு பாகங்களாக வெளியாக தயாராகி வருகின்றது.
இந்தியன் 2 மற்றும் இந்தியன் 3 என இரு பாகங்கள் தயாராகியுள்ள நிலையில் முதல் பாகம் இந்த சம்மரில் வெளியாகும் என எதிர்பார்க்கப்பட்டது. ஆனால் கமல்ஹாசன் தேர்தலில் பிஸியாகிவிட்டதால் ஏப்ரல் மாதம் இப்படம் வெளியாக வாய்ப்பில்லை என சொல்லப்பட்டது. அதைத்தொடர்ந்து தமிழ்நாட்டில் தேர்தல் முடிந்த பிறகு மே மாதம் இந்தியன் 2 வெளியாகும் என எதிர்பார்க்கப்பட்டது.
ஆனால் தற்போது வந்த தகவலின் படி இப்படம் ஜூன் மாதம் தான் வெளியாகும் என தெரிகின்றது. இந்தியன் 2 திரைப்படம் ஒரு பான் இந்திய படம் என்பதால் இந்தியா முழுவதும் தேர்தல் முடிந்து முடிவுகள் அறிவிக்கப்பட்ட பிறகே இப்படத்தை வெளியிடலாம் என படக்குழு முடிவெடுத்துள்ளது. அந்த வகையில் இந்தியன் 2 திரைப்படத்தை ஜூன் மாதம் 13 ஆம் தேதி வெளியிட படக்குழு முடிவெடுத்துள்ளதாம்.
கமலுக்கும் ஜூன் மாதத்திற்கும் ஒரு சென்டிமென்ட் இருந்து வருகின்றது. கமலின் நடிப்பில் ஜூன் மாதம் வெளியான திரைப்படங்கள் பிளாக்பஸ்டர் வெற்றியை பெற்றுள்ளது. 2008 ஆம் ஆண்டு இதே ஜூன் 13 ஆம் தேதி தசாவதாரம் திரைப்படம் வெளியானது.
அதைப்போல 2022 ஆம் ஆண்டு ஜூன் 3 ஆம் தேதி விக்ரம் திரைப்படம் வெளியானது. இவ்விரு படங்களும் மிகப்பெரிய வெற்றியை பெற்ற நிலையில் தற்போது இந்தியன் 2 திரைப்படமும் ஜூன் மாதம் வெளியாகவுள்ளது.
இதையடுத்து ரசிகர்கள் பலரும் கமலும் சென்டிமென்ட் பார்க்கிறாரா ? என கேள்விகேட்டு வருகின்றனர். இந்நிலையில் தசாவதாரம், விக்ரம் படங்களை போல இந்தியன் 2 திரைப்படமும் மிகப்பெரிய வெற்றியை பெரும் என்றே எதிர்பார்க்கப்படுகின்றது என்பது குறிப்பிடத்தக்கது.